එල් නිනෝ තත්ත්වය ප්‍රබල වීම නිසා ඉදිරි ඔක්තෝබර් සහ නොවැම්බර් මාසවලදී දිවයින පුරා වැසි තත්ත්වයේ වර්ධනයක් සමඟ ගංවතුර අවදානමක් මතුවිය හැකි බව කාලගුණ විද්‍යා දෙපාර්තමේන්තුව පවසයි.

කාර්යයේ නියුතු කාලගුණ විද්‍යාඥ මලිත් ප්‍රනාන්දු මහතා පවසන්නේ පැසිෆික් සාගරය ආශ්‍රිතව එල් නිනෝ තත්ත්වය ප්‍රබල වීම සහ ඉදිරියේදී බෙංගාල බොක්ක මුහුදු ප්‍රදේශය සක්‍රීය වීම මෙයට හේතු වන බවය.

දැනට පවතින කාලගුණික දත්තවලට අනුව ඉදිරි දින කිහිපයේදී නිරිතදිග ප්‍රදේශවලට වැසිබර කාලගුණයක් බලාපොරොත්තු විය හැකි අතර, වියළි කාලගුණයක් පැවැති ප්‍රදේශවල මෙම මාසයේ අග එනම් 28, 29 වනදා සිට ගිගුරුම් සහිත වැසි වර්ධනය වීමේ හැකියාවක් පවතින බවද ඒ මහතා පැවසීය.

මේ අතර අද (25) දිනයේදී බස්නාහිර, සබරගමුව, ගාල්ල, මාතර, මහනුවර සහ නුවරඑළිය යන ප්‍රදේශවලට විටින් විට වැසි ඇති විය හැකි අතර, පස්වරු 2.00 න් පමණ පසු ඌව පළාතට මෙන්ම මඩකලපුව සහ අම්පාර දිස්ත්‍රික්කවලට තැනින් තැන ගිගුරුම් සහිත වැසි ඇති විය හැක.

එමෙන්ම කන්කසන්තුරේ සිට පුත්තලම දක්වා සහ මාතර සිට පොතුවිල් දක්වා වන මුහුදු ප්‍රදේශවල සුළගේ වේගය පැයට කිලෝමීටර් 50-55 දක්වා වැඩි විය හැකි බැවින් මුහුද තරමක රළු විය හැකි බව වාර්තා වේ.

හලාවත සිට පොතුවිල් දක්වා මුහුදු රළ මීටර් 2-3 අතර ප්‍රමාණයකින් ඉහළ යා හැකි අතර, බේරුවල සිට මාතර දක්වා වෙරළාශ්‍රිත ප්‍රදේශවල මුහුදු රළ ගොඩබිමට පැමිණීමේ අවදානමක් පවතින බැවින් ඒ පිළිබඳව අවධානයෙන් සිටින ලෙස කාලගුණ විද්‍යාඥ මලිත් ප්‍රනාන්දු මහතා ධීවර, නාවික සහ වෙරළබඩ ජනතාවගෙන් ඉල්ලා සිටී.

එහිදී අදහස් දැක්වූ කාර්යයේ නියුතු කාලගුණ විද්‍යාඥ මලිත් ප්‍රනාන්දු මහතා,

''අද දවසේදී බස්නාහිර සහ සබරගමුව පළාත්වලත්, ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි ඇති විය හැකියි. ඒ වගේම සවස 2න් පමණ පසු, ඌව පළාතේ, මඩකලපුව සහ අම්පාර දිස්ත්‍රික්කවලත්, තැනින් තැන ගිගුරුම් සහිත වැසි වර්ධනය වීමේ හැකියාවක් පවතිනවා. දිවයින වටා වන මුහුදු තීරය පිළිබඳව අවධානය යොමු කරද්දී, විශේෂයෙන්ම හලාවත සිට, කොළඹ සහ ගාල්ල හරහා මාතර දක්වා වෙරළට ඔබ්බෙන් වන මුහුදු ප්‍රදේශවල, අද දවසේදී, තැනින් තැන වැසි ඇති විය හැකියි. සුළං නිරිත දෙසින් හමා ඒවි. සුළඟේ සාමාන්‍ය වේගය පැයට කිලෝමීටර් තිහ, හතළිහ අගයන් ගන්න පුළුවන්. කන්කසන්තුරේ සිට මන්නාරම හරහා පුත්තලම දක්වා සහ මාතර සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළං වේගය විටින් විට පැයට කිලෝමීටර් පනහ, පනස් පහ පමණ අගයන් දක්වා වැඩි විය හැකි බැවින් එම මුහුදු ප්‍රදේශ විටින් විට තරමක රළු ස්වභාවයක් ගන්න පුළුවන්.

මීට අමතරව විශේෂයෙන්ම අද දවසේදී හලාවත සිට කොළඹ සහ ගාල්ල හරහා මාතර, පොතුවිල් දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ උස මීටර් දෙකත්, තුනත් ප්‍රමාණයකින් ඉහළ යාමේ හැකියාවක් පවතිනවා. ඒ අනුව විශේෂයෙන්ම අපි ගත්තොත් බේරුවල සිට ගාල්ල හරහා මාතර දක්වා වෙරළ ආශ්‍රිත ප්‍රදේශවල මුහුදු රළ ගොඩබිමට පැමිණීමේ හැකියාවකුත් පවතිනවා. ඉතින් මේ සම්බන්ධයෙනුත් සිය අවධානය යොමු කරන්න කියලා ධීවර සහ නාවික ප්‍රජාවට, ඒ වගේම වෙරළබඩ ජනතාවට මතක් කර සිටිනවා.

දැනට පවතින කාලගුණික දත්ත අනුව අපි ගත්තොත් විශේෂයෙන්ම ඉදිරි දවස් කිහිපයත්, දිවයිනේ නිරිතදිග ප්‍රදේශවල වැසි ඇති වේවි. විශේෂයෙන්ම වියළි කාලගුණයක් පැවතිච්ච ප්‍රදේශවල මේ මාසයේ අග, ඒ කියන්නේ විසිඅට, විසිනමය සහ ලබන මාසයේ ඉඳන් කාලයේ ගිගුරුම් සහිත වැසි වර්ධනය වීමට තත්ත්වයන් නිර්මාණය වේවි. සුළං ප්‍රවාහයන් වෙනස් වීමේ හැකියාවන් පවතිනවා.ඉතින් ඒ අනුව දැනට තියෙන විදිහට අපිට දකින්න පුළුවන් වෙන්නේ ඉදිරි දවස් කිහිපයට යම් බලපෑමක් ඇති විය හැකියි. ඒ අනුව තමයි ඇත්තටම ඉදිරි දවස් කිහිපයත් තරමක වැසිබර තත්ත්වයක් බලාපොරොත්තු වෙන්න පුළුවන්, විශේෂයෙන්ම දිවයිනේ නිරිතදිග ප්‍රදේශවල.''

තවදුරටත් එල් නිනෝ තත්ත්වය ප්‍රබල වෙමින් පවතිනවා පැසිෆික් සාගරය ආශ්‍රිතව. ඉතින් ඒ අනුවම ඇත්ත වශයෙන්ම අපි ගත්තොත් ඔක්තෝබර් සහ නොවැම්බර් මාසවල අපි අපේ පුරෝකථනවල තිබිච්ච විදිහටම වර්ෂාපතනයේ වර්ධනයක් තමයි බලාපොරොත්තු වෙන්නේ. ඉතින් ඇතැම් අවස්ථාවල අපිට ගංවතුර තත්ත්වයන් සඳහා සූදානම් වීම අවශ්‍ය විය හැකියි. සාමාන්‍යයෙන් ගත්තත් ඔක්තෝබර්, නොවැම්බර් දකිනවා ගංවතුර තත්ත්වයන්. විශේෂයෙන්ම බෙංගාල බොක්ක සක්‍රීය වීමත් සමඟ ඇති වන තත්ත්වයන්. ඉතින් මෙවරත් අපි හිතනවා වර්ෂාවේ වැඩි වීම අනුව එවැනි තත්ත්වයන්වලට අපිට සූදානම් වීම අවශ්‍ය වේවි.